هل تعلم سر غضب زوجتك ؟
بقلم /ا. د فتحي الشرقاوي
أستاذ علم النفس بجامعة عين شمس
عيب عليك كراجل..
انك تحرج مراتك وتقلل وتسخف..
من كلامها وتصرفاتها..
قدام اي حد كائنا من كان غريب أو قريب
يعني إيه عادي علشان الموجودين ..
ابويا وامي واخواتي ومفيش حد غريب…
ياسيدي لازم تعرف ان كرامتها من كرامتك
أنت كده بتفتح الطريق من غير مابتشعر
لكل من هب ودب إنه يهينها ويستخف بيها.
عاوز أسألك سؤال
لو اعصابها فلتت منها وردت عليك بنفس طريقتك قدامهم
هيكون موقفك وصورتك ايه؟
عاوزك تفهم معايا ان مشكلاتك الكتير مع مراتك.
اللي بتقول مش عارف سببها ايه..
ممكن تكون راجعة لسوء تعاملك اليومي معها
لا بتسمعها..وصوتك عالي عليها
ومابتقعدش معاها..وبتنتقدها على طول
والسلوكيات دي بتبقى عاملة زي كرة التلج.
يعني ممكن تحرجها بينك وبينها او قدام حد
وماتردش عليك..
خيالك المريض اوحالك إن الموقف انتهى.
لأ ياعزيزي… دي بقى اول المشكله..
شوف معايا اللي هيترتب عليها..
اول رد فعل إنك هتسقط من نظرها كمصدر لامانها وانك ضهرها.
تبدأ اول مرحلة كرد فعل في اهمال طلباتك وحاجاتك
كمان ممكن تلاقيها بدأت تنفعل على اولادك وتتنرفز عليهم
كرد فعل للي جواهها ومعرفتش ترد عليك..
وغيره وغيره وغيره..
مشكلات كتير ترتبت على موقفك غير الناضج منها
ياريت تفهم إن المشكلة الواحده ممكن تجيب
مشكلات وراها كتير
وبعدين نرجع نقول هى مشاكلنا كترت ليه..
احترامك وتقديرك لمراتك أول خطوة ..
في انحسار مشكلاتك العديدة معاها داخل بيتك.
حتى لو بينكم اختلاف في وجهات النظر.
فإن احترامك ليها هيخلي مناقشتكم مع بعض
ووصولكم لحلول ايجابية امر سهل
أما انعدام الإحترام فمعناه كل اشكال التجاوزات.
اللي حضرتك ممكن تتخيلها او لا تتخيلها
وياريت تحط خط تحت كلمة لاتتخيلها ياراجل يامحترم
لان الحرمان العاطفي لدى الزوجه ممكن يدفعها
لحاجات خيالك مايجيبهاش
من وحي جلسات الإرشاد الأسرى والزواجي
#مجرد _خاطرة