لو عشت التجربة
بقلم : د. أسماء الخولى
الناس عندها ثقة رهيبة في قدرتها علي تحمل اللي مجربتوش.. إيمان بقوتهم إللي متحطتش في إختبار.. قناعة بعفتهم رغم عدم وجود فرصة للزلل..يقين بأمانتهم رغم إنتفاء مواضع الخيانة .
الثقة دي ببساطة بتخليهم يحكموا ببساطة علي تجارب غيرهم بالوصم للي فشلوا في إختبارات الدنيا والتسفيه من اللي نجحوا…
بس اللي مر بالتجربة هو الوحيد اللي يفهم إن الإختبار غير التوقع ولو نجح مش بيزايد علي اللي سقط
قوتك تتحسب بإللي شلته فعلا مش اللي اتفرجت علي غيرك شيله وحسيت انه سهل…
الناس بتعلم فيهم تجاربهم بطريقة فوق الإستيعاب في تجارب بتخليك أقوي وتجارب تحسسك بضعفك وتجارب تثبتلك إنك صح بس في النهاية الإنسان قبل التجربة مش هو هو بعدها …
رفقا بالناس ومتحكمش على حد حتي لو شايف من وجهة نظرك إنه شخص سيئ لأنك ببساطة كان ممكن تبقي أسوء منه لو عشت التجربة .