قصيدة (رتبة شهيد)
شعر بالعامية المصرية
كلمات : ناهد علي
رايح فين يا ابن بطني ؟
رايح اذود عن الحدود
رايح آخد رتبة شهيد
أوعي يا أمي تحزني
احنا هنتقابل تاني
من جديد
وقولي لابني اللي اتولد:
كمل المسيرة يا ولد
كمل ودافع عن البلد
بعزم شديد..وقلب حديد
روح خد رتبة شهيد
…وعلى فكرة يا أمي
أنا عنك مش بعيد
أنا نسايم الهوا
أنا السحاب والمطر
أنا ليالي القمر
انا قطرة الندى على ورق الشجر
هتوحشيني يا مصر
الشوارع والحواري
واهل بلدي الطيبين
وطبعا أم الولد ..هى الوتد
بقول لها : شدي حيلك
وشدي على إيد الولد
وفهميه إن السعادة:
النصر أو الشهادة
لجل عيون البلد.