قصيدة الغربة
كلمات الشاعرة فاطمة عبد الحكيم
الفرقة الثانية خدمة اجتماعية -حلوان
أنا نعلي داب مـ الجري والشقا
ودموعي سالت مـ الفرقة واللقا
٨ سنين بتغرب وأنام مشتاق
ودموعي في الأوراق
بنزف في حبر وصبري طال
أملي في جبر يبني الجبال
اللي هدها نظرة وداع في فراق !
قبل المنادي ما ينادي عـ الركاب :
قولتلها وبنظرة وداع : باقيالي لما أرجع ؟
قالتلي هستناك ؛ وياك لآخر العمر
ولا هبقى يوم لـ سواك !
سافر وقلبي معاك ..
وسافرت واتغربت ..
وتعبت واتمرمطت
فوق طاقتي أنا اتحملت
ولا وهلة أنا إتجملت
عجزت وإستحملت
مع إني عشريني !
لكن عجوز الشكل ..
ملعون أبوه الشغل
اللي يبعد قلوب عن بعضها
عن كل من حبها
مريت بكفاح
وصابتني جراح
ومنمتش مرة ببال مرتاح !
أكبر مبالغ مـ الفلوس جمعتها
أعظم سنين من عمري ضيعتها ..
وظروفي أهي عنيدة ..
يا بلادي يا بعيدة
وسايباني لوحدي حزين
في البلد الجديدة ..
أتمنى لينا عودة
يا ضيّ قلوبنا ليلك نور
صبحت في بعدك أنا گ الطور
في ساقية وجعي وحدي بدور !!
يا رب بلادي أنا موجوع !
بركان ألم وفراق بدموع
فيضان أمل وأنا أملي رجوع
طعم الفراق أمر مـ الصبار
دمع المفارق في ليله زي النار !
كيف السبيل للمطار ؟!
دة أنا أوضتي صارت بار
بيسكنوه السكارى المتغربين مـ الحياه !!
كيف السبيل بالله !!
دة أنا أمي في فراقي مقالتش قولة ” آااه ”
وأختي اللي ضمتني في الفرقة مبكتليش !
حتى اللي حبتني وقالتلي هستناك
قالت عذراً ، لابد اني أحب وأعيش ..
ومستنتش لرجوعي !
محدش فيهم إهتم بدموعي
ولا بأحوالي ومشاكلي ..
وزرعوا الهم في مشاتلي
وصبوا القساوة بغباوة
نقلت الهم لجل أرمية
غرسوه في قلبي وبقوا يتسارعوا على مين يرويه
مبسوطة ي بلادي !!!
سايبلك روحي واخواتي
وبرة بينهوا في حياتي !
يا رب البلد الطيبة الحرة
بحق الليالي البائسة المرة !
لو مكتوبلي أموت برة
أرجع لحضن البلد دي
ولو مرة ..
وأشوفها بتبكي لمماتي !
وحشاني ي بلادي ..