رسالة “فتاة مثقفة” تثير ضجة كبيرة على موقع التواصل الاجتماعى وتحديدا على صفحة المنوفية فيس بوك

بقلم زغلول على

أن المغالاه فى المهور ومستلزمات الزواج وضع ثقل متبادل على عاتق اسر الشباب (العريس والعروس )   ، الأمر الذى يتفاقم يوما تلو الآخر بسبب تلك العادات الاجتماعية الخاطئة والتقليد الاعمى  والتباهى بين الناس بعضهم البعض  .

وقد أثارت إحدى صفحات التواصل الاجتماعى هذة الظاهرة التى ترهق الكثير من الأسر المصرية وهى صفحة المنوفية فيس بوك وانا اوجة الشكر للقائمين على الصفحة ، حيث كتب الاتى :-

“اللى كاتبه الكلام ده العروسة مش العريس
ايه رأيكم فى الكلام ده
يوم فرحي
_ مش هعمله ف قاعة ب 50 الف جنيه و لا حتى ب ١٠ الاف عشان بس خاطر الناس تيجي تتكلم وتتريق علي ديه وده وتمشي 
_ لما اتجوز وموضوع اني افتح دولابي لحد ويشوف هدومي مش هيحصل
انتو جايين تباركولنا مش داخلين معرض موبيليا 
_ بنت خالك وبنت عمتك جالها شبكه بـ كذا وانتي مش اقل منها 
انا مش هتجوز الشبكه حضرتك كفايه عليا ان يراعي ربنا فيا 
_ لما اكون مخنوقه الشبكه مش هتطبطب عليا و مش هقعد اتكلم مع الغويشه الدهب
_ مش هجيب 15 بيجامة قطيفه و 24 مشجرة و 150 عبايه  دا بيتي مش بنك الكساء 
هجيب اللبس اللي بحبه و يريحني حتى لو بجامه واحده ومش عايزة أبقي زي حد

ورحم الله امرءا عرف قدر نفسه 
_ مش عاوزة اوضه نوم من اخشاب السافانا الموجودة ف الغابات الاستوائيه العتيقه المطليه ب ماء الذهب 
عايزه سرير عادي بس انام و انا نفسيا مرتاحه و مش معيطه كل يوم 
_ مش عاوزة شقه مليون الف متر 5 اوض و7 رسيبشن و 5 حمام و 4 مطبخ و 16 بلكونه 
اي مكان هيجمعنى ب اللى اخترته سوا هنشوفه جنه والله 

انتو بعد الفرح هتروحو و احنا اللي هنكمل مع بعض

سيبونا نختار اللي هيريحنا عشان دي حياتنا احنا
و لما نتخانق لا الدهب و لا طقم الطاسات اللي هيرجعونا لبعض … حبنا و احترمنا و تفهمنا و تقديرنا لبعض هو اللي مهما بعدنا هيرجعنا 

= بلاااااش مقارنات ارجوكو و سيبوا الناس تجيب اللي ع قد ظروفها و اللي يريحها و اللي هتستخدمه وبس و بلاش تدخلات ف حياة الناس الله يفرح قلبكو و يهديكو متحملوش الناس فووق طاقتها 
{{{{{{{ كلمات فتاة مثقفة }}}}}}}}”

دى كانت الرساله اللى نتمنى الأهل يفهموها ، مش بتقول تلغى كل حاجة ، بس بنقول خليك ايجابى ، لو بطلنا نبص لغيرنا هنرتاح ومش هيبقى بينا غارمين ولا غارمات وصل بيهم الأمر للسجن لأنهم مش قادرين يسددو المبالغ اللى عليهم من جهاز ولادهم .

اهم ما فى الموضوع اننا نختار اللى هيسعدو اولادنا وبناتنا ، اللى نرتضى دينة ، اللى اصله طيب ، ويارب يسعد ابنائنا جميعا .