دكتور فتحى الشرقاوى يكتب.. بكاء الراجل مش عيب
بقلم أ د.فتحي الشرقاوي
استاذ علم النفس بجامعة عين شمس
على فكرة..
مين اللي اقنعنا وحط في دماغنا..
إن بكاء الراجل عيب..ومايصحش..
يعني علشان أرضيكم واكون كويس في نظركم
لازم اكتم ضعفي جوايا وما اعبرش عنه.
ليه كل ده ..
علشان تقولوا عليا انا راجل وقوي
ياجماعة..مش عيب خالص..
إنك تظهر ضعفك الإنساني الطبيعي التلقائي
في مواجهة بعض المواقف والتفاعلات الإنسانية.
خاصة الصادمة منها مثل الأزمات القويه الشديدة
اللي ممكن تزلزل وجدان و خاطر الحجر مش البشر
مثل
#فقد الأحباب من الاهل والأقارب
#كسرة الخاطر من أقرب الأقرباء ..
#خيبة الأمل غير المتوقعة #والخذلان
ليه بتخبي مشاعرك الطبيعية في مواجهة المواقف دي.
كل ده علشان صورة و نظرة الناس فيك..
#يغوروا كلهم ويروحوا في #ستين داهيه تاخدهم.
ماتحاولش تكون #شخصيتين في شخصية واحده
علشان ترضى ده ودي ودول…
لأ..
اوعى تعيش الصراع جوه نفسك…
شخصية #جواك منهارة وترغب في تلبية نداء فطرتها
وشخصية #براك عاوزة تظهر قدام الناس بقوة وصلابه عكس مشاعرك اللي جواك.
وما بين الشخصية الأولى والثانية..
بتلاقي نفسك #ممزق #ومتقطع جزئين..
وكل ده علشان #ترضي الناس..
صدقني..
مش هيرضوا عليك سواء أظهرت قوتك أو اخفتها
لأن رضا الناس #غاية #لا تدرك..
ملحوظه.
من عشرين سنة وانا أسير وراء جثمان امي الطاهرة
والدموع تترقرق في عيني ..
تقدم لي أحد المعزين وقال لي..
امسك نفسك وخليك راجل عيب كده…
البكاء للحريم( عفوا للستات)…
بالذمة عليكم..ده يتقالو ايه…
يارب نفهم.
#مجرد _خاطرة