حب بالإكراه !!
بقلم ا.د. فتحي الشرقاوي
أستاذ علم النفس بجامعة عين شمس
بتتخانق معاه..وبتنكد عليه..
علشان يهتم بيها ويقعد معاها
وبتعاتبه إنه مابيقلهاش كلمة حلوه..
وتكون النتيجه…يقعد جنبها …
ولا طايق لا نفسه ولا طايقها…..
هل كده…انت حققتي اللي انت عاوزه…
ياسيدتي …
لا الحب بيتطلب..ولا الاهتمام بيتطلب.
يعني ايه بتطلبي منه يهتم بيك…
يعني ايه بتلحي عليه حد يهتم بيك…
هو الإهتمام بيك محتاج تتسوليه وتشحتيه منه
هو الاهتمام بيك..محتاج تطارديه وتنتزعي منه الإهتمام بيك.
يا سيدتي ..
لو طلبت الإهتمام منه وهو اصلا مش حاسس بيك.
وحصل إنه اهتم بيك بعدها..
ده مايبقاش أسمه إهتمام..
يبقى أي حاجه غير مفهوم الإهتمام..
عاوزه تقولي مجاملة. …ماشي..
عاوزه تقولي وجاهه. ….ماشي..
عاوزه تقولي تمثيل وتصنع ..ماشي..
عاوزه تقولي بياخدك على قد عقلك..ماشي
لكن العجيب والغريب..
أنك بتكوني مصدقه نفسك انه بيهتم بيك..
والغريب والعجيب كمان…
إنه بعد مابتطلبي منه انه يهتم بيك.
بيبقى عارف ومتأكد وواثق. .إنه بيضحك عليك وبيجاملك
علشان بس ماتزعلش وماتتقمصيش
من الاخر كده انتم اتنين تعبانين وبتمثلوا على بعض.
ياسيدتي.
أنت عندك حرمان عاطفي وهو عنده تبلد عاطفي
يامستني السمنه من النمله هى النمله بتطلع سمنه.
ايش تعمل الماشطه في الوش العكر…
يارب نفهم….