الضمان ؟؟

بقلم د/ أسماء الخولى
عاوزة اتكلم معاكم عن موضوع مهم جدا وهو ” الضمان” ليه بنتعامل مع اي علاقة في حياتنا حب.. صداقة.. أصحاب بفكرة الضمان انا ضامن الشخص ده لدرجة إني لو عملت أي حاجة معاه مش هيمشي لمجرد إننا بنحس قد إيه هو صبور وبيحب من قلبه ومتمسك فبيكون بقي الجزاء إنه دايما هو ومشاعره ووقته وحبه يبقوا دايما مضمونين هيروح فين يعني… فندوس وندوس ونعيش حياتنا والدنيا تتغير والشخص ده يستهلك، ويحس انه خلاص مش قادر يكمل فيقرر يبعد فنقوم ايه بقي نحس بقيمته ونحس إن كان عندنا حيطة بتسندنا وحضن دافي كان دايما مفتوح لينا وضاع طب الحيطة دي مين ممكن يعوضها! وليه لازم نتحرم من الناس المهمة في حياتنا علشان نقدر قيمتها
وليه دايما بندور علي المفقود وننسي الموجود علي رغم إننا ممكن نكون اسعد ناس في الدنيا بالحاجات إللي مالكينها… والأغرب كمان إننا بنعمل المستحميل علشان نرجع الناس اللي بعدت مع اننا كان ممكن نعمل الممكن علشان نحافظ عليهم ويفضلوا.
قابلنا صبرهم ومعروفهم وسندتهم بشر… من غير ما نقصد بنغير في الناس حاجات كتير.. بنغير طريقة حبهم للناس وسندتهم ليهم بنستهلك طاقتهم وبنطفي لمعة عيونهم.
بلاش فكرة الضمان وندعي كلنا ربنا بإننا منشوفش قيمة الأشياء بعد فقدانها وإنه ينور بصيرتنا وقلوبنا دايما للحاجات الحلوة في حياتنا