اعرف مزاجك اتغير ليه ؟؟

بقلم / ا.د. فتحي الشرقاوي
أستاذ علم النفسجامعة عين شمس

إيه إللي يخلي مزاجك..يقلب مره واحدة..
من غير ما يكون..قدامك أي حدث يستدعي ده.. ..
وتلاقي نفسك مش طايق نفسك ولا طايق حد جنبك..
والغريب..
لما نسألك ونقولك… إيه ه إللي قلب مزاجك كده..
تقولنا وإنت صادق في ردك… ..
ما أعرفش إيه إللي قلب مزاجي بالشكل ده…
نقوله.. طيب سمعت حاجه ضايقتك شخصيا… الإجابة لأ
في موقف حصلك ضايقك… الإجابة لأ
شوفت مشهد خلاك متوتر… الإجابة لأ
طيب السؤال..
لما مافيش أي حاجه سببتلك ضيقك وتعكير مزاجك..
أومال تفتكر إيه السبب….
يقول.. ما أعرفش…. ولو كنت أعرف إللي مضايقني
كنت حليت مشكلتي وغيرت مودي ومزاجي للأحسن .
بص ياسيدي.. بصي ياستي…
أحد التفسيرات النفسية لموضوع تقلب مزاجك ده….
ممكن يكون راجع لنظرية إسمها التداعيات و الاستدعاء..
والنظرية دي بتقول..
إن الواحد فينا ممكن يشوف حاجه ما لهاش علاقه بيه شخصيا.
أو يسمع كلام من حد ما لهوش أي علاقه مباشرة بيه شخصيا…
وبعدها على طول بيحصل تغيير رهيب في مزاجك…
وتفضل تدور وتبحث عن أي حاجه شخصيه حصلتلك..
و سببتلك القلب المزاجية دي.. و ماتعرفش..
عارف إيه إللي حصل..
إن الحاجات إللي سمعتها أو شوفتها أو حتى شمتها..
إللي ما لهاش علاقه مباشرة بيك…
دخلت جواك وفجرت جواك حاجات مماثله ليها..
وفجأة تلاقي مشاعر حزن طالعه من جواك من غير أي سبب براك..
علشان كده مصاحبة المحبطين ومصدري المشاعر السلبية..
ممكن يكون أحد أسباب تغير مزاجك من غير ماتحس..
لإنهم طول ماهم معاك وإنت معاهم..
بيتكلموا في موضوعات سلبيه وكئيبة…
والكلام السلبي بتاعهم ده بيستدعي ويجرجر من جواك مشاعر حزينه..
وتفضل تسأل.. ليه ياترى أنا كنت كويس..
ساعتها إفتكر نظرية التداعيات و الاستدعاء دي..
لو عشت فرح غيرك.. هتستدعي افراحك إللي جواك..
والعكس صحيحا….
مجرد خاطره