فترة صمت !!.. (silence zone)
بقلم : د. رضوى السيد
كل واحد مننا بيجي عليه فترة صمت !!.. (silence zone)
يعني بتبقى عايز تسكت متتكلمش مع حد مش بترد على تليفونات مش بترد على رسائل
ولو حد صمم بيبقى كله تمام، بتبقى ولا بتفكر ف اللى فات ولا عايز تفكر فى الجاي تلاقي نفسك واقف فى النص، ولا أي افتراضات ولا أي نوع من أنواع التفكير.
المرحلة دي بتبقى بينك وبين نفسك..
أنت هنا مش محتاج حد يسمعك، ولا حتى قادر تحكي مع نفسك على اللى مزعلك أنت عايز الفترة دي تعدي بمنتهى الهدوء والسلام النفسي عشان تعرف تكمل الجاي.
بتبقى مرحلة سكون تام وقفة مع نفسك زي بالظبط لما كان التليفزيون زمان بيفصل الساعة ١٢ ويرجع تاني الصبح أنت بقى فى مرحلة التشويش بتاعة بعد الساعة ١٢ دي بالظبط،
فاصل عن العالم لكن فى نفس الوقت موجود عايز تشحن عشان تعرف تكمل، المرحلة دي ممكن تطول وممكن تقصر على حسب مودك واحتياجك للهدوء ده، بس المهم تكون فاهم نفسك وشايفها وعارف هيا محتاجة ايه وتسد الاحتياج ده عشان ترجع بقوة اكتر وأحسن من الأول.
علشان كده لو لاقيت حد قافل على نفسه أو مش بيرد عليك.. ده مش قلة تقدير ليك لا ده محتاج يبقى مع نفسه بس مش أكتر “احترم صمته”.