ست سمجه وغلسه وتبته ودمها يلطش(الفاشلة لما تنصح)


بقلم : ا.د / فتحي الشرقاوي
أستاذ علم النفس جامعة عين شمس

آه من الجواز وإللي بيتجوزوه…
أنا حيلي مهدود على طول من خدمة البيت والعيال.
أنا إيه إللي دبسني وخلاني أتجوز..
يغور الجواز وإللي بيتجوزوا..
خدنا إيه من الجواز غير الغلب والتعب وشيل إلهم.
ياريت يابنات تفكروا شوية قبل ماتتنيلوا وتتدبسوا في الجواز.
دي بعض العبارات إللي قدرت أسجلها..
من على بعض صفحات الفيس لبعض الستات الفاشلات

كتبوا العبارات دي…
علشان ينبهوا البنات إللي على وش جواز..
بأن الجواز مشروع اجتماعي فاشل..
وماورهوش غير الهم والغم والوجع والتعب والارهاق وكله مشاكل
قال إيه بيحذروهن من الجواز ومصاعبه ومآسيه…
بصي ياوليه يا فاشله منك ليها….
كونك وآحده فاشله…
ملقتكيش راحتك في الجواز ولا اعبائه..
يبقى ده مش معناه إن كل البنات هيفشلن في الجواز زيك.
وبعدين مين قالك إنك شخصية مهمه قوي..
علشان حضرتك بتعرضي سيرتك الذاتية وتجربتك الفاشله..
وتحذري من خلالها بقية البنات وتحرضيهن على عدم الزواج..

حد قالك إنك صاحبة جائزة نوبل في كيفية العيشة الهنيه في الحياة الزوجية.
طيب إنت وليه فاشله..
ياريت تتنيلي وتدوري على حل لمشكلتك مع جوزك وبيتك
وتركزي مع نفسك واشتغلي على نفسك كزوجه..
بدل ما إنت عامله فيها مرشده زواجيه واسريه …
يمكن ربنا يفك عقدتك وتنجحي في حياتك الزوجيه.
كلمة اخيره.. ..
بصي يا فاشله….زي ما إنت جربتي الجواز..
وكنت هتموتي إن حد بس يعبرك وياخد باله منك..
ويخبط على بابكم ويطلب ايديكي ويخطبك ويتجوزك ..
ياريت تسيبي البنات إللي لسه ماتجوزوش في حالها
سيبيهم يعيشوا تجربتهن بأنفسهن هن مستغنيات…
عن نصايحك الفاشله يا فاشله..
حقيقة مش مجرد خاطرة