جربت كسرة النفس؟!

بقلم ا.د.فتحي الشرقاوي
أستاذ علم النفس بجامعة عين شمس

جربت كسرة النفس…
لما تكون فرحتك بتسبقك..
وبتجري علي حد بتحبه…
علشان تقوله حاجه مفرحاك جدا.
وانت كلك لهفه وفرح إنه هيسعد
بقدر السعادة اللي بتحس بيها.
و فجأة تلاقي الدنيا ضلمت قدام عينك.
وماتشوفش غير الوش الجامد…
والمشاعر المتبلده والانفعالات المسطحه…
والتعبيرات الموتوره والكلمات الجافه…
والايماءات البارده.
ساعتها بيجيلك احساس من جواك.
ان فرحتك ماتت وشبعت موت…
و بدل ماكنت بتدور على حد يشاركك فرحتك.
بقيت محتاج حد يواسيك في خيبة أملك
ومش كده وبس بتلاقي نفسك..
بتلوم نفسك وبتعتب عليها قوووي..
ايه اللي خلاك تروح للحيطه المايله دي
علشان يشاركك فرحك ولهفتك.
#دور على نصك اللي يفرحك مش نصك اللي يوجعك
#مجرد خاطرة