جراحات التجميل النفسية…

بقلم : ا.د فتحي الشرقاوي
أستاذ علم النفس جامعة عين شمس

عمليات التجميل لما تبقى لضرورة طبيه وصحية..
يبقى أهلا وسهلا…
لكن لما يكون عمليات التجميل أحد وسائل الأنا..
لمجرد حب الأنا المتورم
و إدمان حب الظهور والاستعراض..
يبقى كده نقول لأ ولأ ولأ.. وستين لأ….
علشان كده..
ياريتك وأنت بتعملي شفط لدهون بطنك وأردافك …
ما تنسيش كمان تعملي شفط لأفكارك العقيمة..
علشان تبقي جميلة ورشيقة بدنيا …
ومش ساذجه ولا عبيطه فكريا وعقليا. ..
ياريت وأنت بتعملي بوتوكس وكوليجين ونيوفيل
ماتنسيش كمان تعملي حقن لأفكارك الإيجابية
علشان ماتبقيش جميلة وجذابه مظهريا وتافهه سلوكيا.
ياريت وأنت بتزرعي خصلات لشعرك…
ماتنسيش كمان تزرعيلك شويه طموحات مفيده لك…
يمكن يفيدوكي شوية في حياتك إللي مليانه احباطات
علشان تبقي جميلة وطموحه…
ياريت وأنت بتغيري لون جلدك وعماله ترسمي وشم هنا وتاتو هناك…
ماتنسيش تغيري لون حياتك للأحسن…
علشان تبقي جذابه وحياتك لها معنى…
ياريت وانت بتعملي تعديل لفكك ووجهك و أسنانك..
وتدفعي دم قلبك وتحطي فلوس الجمعيه..
إللي عاملاها بقالك سنين علشان طقم أسنان سمايل هوليود 😂
ياريت ماتنسيش تعملي تعديل في أسلوب تعاملك..
مع غيرك بدون تعالي عليهم أو نفور منهم…
علشان تبقي جميله ومقبوله من اللي حواليك…
ياريت وانت بتعملي شد لرقبتك وإزالة تجاعيد وشك.
ما تنسيش تشدي كمان حيلك وتتخلصي من مشاكلك وعقدك
ياريت وانت بتكبري شفايفك أو أي حاجه تانيه..
ماتنسيش تكبري كمان أخلاقك ومبادئك. …
ده مطلوب…وده مطلوب…
بس السؤال….
التصغير والتكبير والتنحيف والشفط والحقن. ..
معروف مكانهم فين….
في كل مكان ممكن تلاقيه….
لكن ياترى فين المكان ..
اللي ممكن نشفط فيه أفكارنا السيئة . .
ونكبر فيه مبادئنا القيمة.
وننحف فيها انفعالاتنا إللي بنكبرها وبنهولها على الفاضي
ونحقن فيه عقولنا بالأفكار الجيدة… .