بوس أيدك ..وش وضهر !!

بقلم : أ. د. فتحي الشرقاوي.
أستاذ علم النفس جامعة عين شمس

للمقبلين على الزواج احمدوا ربنا أنكم في مصر
تعالوا كده ناخد جوله في طقوس ليلة الزفاف
في بعض المجتمعات…
علشان تعرفوا بس النعمة اللي أنتم فيها

# البنت العروسة في الصين يوم زفافها …
بتلبس فستان ابيض وبتدهن وشها كله وكل جسمها بطلاء ابيض ( رمز العذرية)
تخيلوا بقى معايا …
أنا العريس المسكين ولقيت عروستي ….
يوم فرحي داخله عليا كأنها طالعة من علبة زبادي
تفتكروا أعمل إيه انا بقى ساعتها…
أجيب رغيفين وحتة بصل واتعشى بيها… 

# البنت في الكونغو ممنوع عليها …
هى وعريسها يوم الزفاف الضحك أو الإبتسام ..
قال إيه دليل على الجديه
ولو حد فيهم ضحك يبقى يوم منيل …
ويتلغي الجواز.
طيب افترضوا معايا..
أنا راجل انبساطي وابن نكته ودمي خفيف وبحب الفرفشة ومقضيها ضحك ( هههههه)
يبقى كده عمري ما هشم ريحة أم الجواز .

# البنت في اندونسيا ممنوع يوم زفافها أن رجليها تلمس الأرض
علشان كده أبوها بيفضل شايلها على ضهره
لحد ما يوصلها لبيت المحروس جوزها
طيب افترضوا معايا انا أبوها وجسمي وصحتي.
على قدي والبنت ( اللي ماتتسماش )…
بنتي العروسة…سمينه ومربربه ..
أعمل انا إيه ساعتها…

# البنت في قبيلة بوند في الهند يوم زفافها بتاخد العريس في الغابة وتكشف ضهره وتقرب منه النار وتكويه.
لو قال ( اي..أي. .آه. .آه ) يبقى انت واد خرع ومش راجل وتفضحه وسط كل بنات القبيله..
ينهار منيل وهبل هو انا رايح اتجوز ولا رايح السلخانه.

# البنت في الصومال العريس يقوم زفافها وقدام المعازيم…يقوم مكتفها ورابطها.
وهاتك ياضرب بالبوكسات في وشها…
علشان يعرفها أنه من أول يوم هو المسيطر.
حلوه والله الفكرة الاخيره دي…
وبدل ما أدخل على عروستي ببوكيه ورد…
تلاقيني مديها بوكسين في وشها..
اخلي وشها مطرح قفاها وهى مبسوطه وسعيدة
وتقولي كمان وكمان ماشاء الله عليك…
ياجملي وياسبعي ( نسبة إلى الجمل والسبع )
انا عرفت دلوقتي
انا ليه بحب الصومال قوي..وليه مابحبش الهند .

لكن الحقيقة ان المرأة المصرية هى الافضل بين الجميع