إزاى تاخد القرار ؟؟

بقلم : ا . د / فتحي الشرقاوي
أستاذ علم النفس جامعة عين شمس

لما تلاقي نفسك متردد ومحتار تاخد قرار..
في أي حاجه مهمه بالنسبة لك…
أنصحك بالآتي..
أولا.. إوعى تاخد قرار وإنت مضغوط..
لأن القرار إللي هتاخده في الوقت ده هيكون أقرب إلى الانفعال منه إلى التعقل..
لأنك في الوقت ده بتبقى عاوز تخلص من الضغط بس..
آكتر منك تحل المشكلة.
ثانيا. ما تسلمش نفسك لأي بني أدم..
يوديك ويجيبك ويطرحلك و يقدملك حلول..
لأن كل واحد بيشوف الحل من منظوره و إدراكه وشخصيته هو.
لأن مهما كان البني أدم ده قريب منك.. إلا إنه ممكن ما يكونش حاسس بحاجات جواك..
علشان كده فكر في كام فكره واعرضها على أي حد بتثق فيه..
ساعتها بتبقى إنت صاحب الفكرة والحل..
وغيرك بيضيف ليها بس.
ثالثا.. ياريت تبعد في الوقت ده عن الناس اللوامه الزنانه..
لإنهم بدل مابيشاركوك في حل مشكلتك..
هيفضلوا طول الوقت يؤنبوك ويمصوا دمك إنك وقعت في ال مشكله..
دي ناس مش بتحل.. دي ناس بتعقد..
ولنا عودة مرة أخرى لاستكمال هذه الارشادات
“حقائق مش خواطر”