أبو /أم العوريف

بقلم ا.د.فتحي الشرقاوي
أستاذ علم النفس جامعة عين شمس

شخصية أبو /أم العوريف …بضم العين وتسكين الراء
مين أبو العريف.. وإزاي نتعامل معاه…..
مفيش بيت ولا شلة ولا جماعة..
إلا لما تلاقوا الشخصية دي موجوده….
و كل واحد فينا من زمايله بيبقى نفسه ينفجر فيه..
ويرد عليه ويوضحله إنه مابيفهمش أي حاجه..
بس كلنا مكسوفين منه…. فبنسيبه يهري وينكت زي ماهو عاوز.
البني آدم ده مابيفهمش أي حاجه في أي حاجة في الدنيا.
و المصيبة إنه شايف نفسه محصلش ومفيش حد بيفهم غيره.
أي موضوع هتفتحوه للمناقشه هيتكلم فيه..
مفيش موضوع ولا حاجه مابيعرفهاش.
بيفتي ويهري في اي موضوع.
كأنه خبير و عالم ومستشار في كل حاجه.
وهو في الحقيقة مخه تعبان و أفكاره على أده مسكين.
مش ممكن يديلك فرصة تقول فيها وجهة نظرك.
وأول ما تقول حاجه.. تلاقيه يبصلك شذرا…
إنت إيش إللي فهمك..
ويبدأ يبستفك ويبينلك إنك إنت جاهل ومابتفهمش.
ويبدأ النخع واستعراض خبراته وأفكاره إللي ملهاش أي تلاتين لازمه.
بياخد الجلسه كلها لحسابه… وياسلام لو قولتله..
أنا أرى..أنا أعتقد..أنا أظن..أنا وجهة نظري كذا..
تلاقيه انفعل عليك…واتهمك بالجهل والغباء …
إزاي نتعامل مع البني أدم ده…..
أنا هعرض عليكم شوية أساليب..
وإنت تختار منها إللي يريحك.. على حسب ظروفك.
#أولا
ماتتكلموش معاه في أي موضوع خلافي جدالي..
يعني موضوعات فيها صد ورد.. ورأي ورأي مخالف…
هيبقى يوم اسود ومش هيعدي…
إنت كده بتخليه يلعب براحته في حته في الملعب…
#ثانيا.
سد بؤه على طول بالمعلومات إللي مفيش آتنين يختلفوا عليها.
يعني كلامك معاه بيانات وارقام وحقائق..
وابتعد عن الكلام المرسل معاه لإنه هياكلك بالكلام…
لسانه زي المبرد ما بيقفش….
#ثالثا..
ماتفتحش معاه آكتر من موضوع في نفس الجلسة..
لانك كده ببتديله فرصه عمره للكلام وإثبات ذاته.
#رابعا.
ياريت وإنت معاه تخليك صامت قدر الإمكان..
ومتتكلمش إلا في أضيق الحدود.
وفي نفس الوقت تاخده على قد دماغه..
يعني اشتري دماغك وصحتك وعافيتك بالصمت. .
#خامسا.
خليك جاهز في كل مرة بتتكلم معاه بشريط بنادول.. وياريت اكسترا أحمر ذو فاعليه.. .
وتشوفك كمان أقرب صيدليه لقياس ضغطك وسكرك.
الله يكون في عون إللي عنده النمط ده….